Ricordi della vita e della Calvizzano di un tempo, “Jucammo a ppalline”: con quest’altra lirica Paolo Ferrillo e sua sorella Gianna ci regalano altre emozioni

 Cliccare per ascoltare

"Jucammo a ppalline". Una volta era il gioco preferito dalla maggioranza dei ragazzini. Ogni generazione aveva il suo campione.  Mio fratello Franco – afferma Paolo Ferrillo, autore dei versi, declamati magnificamente da sua sorella Gianna - era bravissimo e uno dei pochi che riusciva a batterlo era 'O mericano, "nu guaglione 'e 'copp''o tunno". Verso la fine degli anni '70, Raffaele (Fasano, il proprietario del negozio ElectroNik di via Mirabelli, ndr) divenne bravissimo; riusciva a colpire biglie che si trovavano distanti dalla sua e l'unico modo per cercare di sfuggire alla "cattura" era riuscire a mettere la biglia al riparo dietro un ostacolo oppure utilizzare, al posto della normale pallina, lo "scignillo", nome con cui noi ragazzini di via Roma chiamavamo le biglie di piccole dimensioni (mini biglie)”.

jucammo a ppalline

menumàle, nu cchiove,

cazuni curti e cartella,

stamme nchiusi d' 'e nnove,

ce saluta 'a bidella,

turnati d' 'a scola

ce mettimmo a jucà

Rafele è 'o campione

tira sempe a spaccà

cartelle e giacchètte

nterra ammuntunàte,

ncoppo, 'e mantesini

cu 'e nocche culorate

cu 'e ddenocchje scurtecàte

ncopp' 'e vàsule nfusi,

cu 'e mmane jacciàte

e cu 'e nasi muccùsi

'o rito gruósso int' 'o ncavo,

nu palmo a ssuppónta,

'a mana nchiusa sta' ferma,

'o tiro è già pronto

'o sguardo ca mmira,

fissa 'o sirciàto,

nu punto preciso,

nu pertùso scavato

regola 'a forza,

'o scatto d' 'o rito,

'a pallina ca parte,

'o rummore d' 'o vvrito

primma zompa doje vote,

po' va sempe cchiú chiano,

ruciulèa, cunnulèa

e 'int' 'a buca rimane

è addiventato padrone,

mo c'amma sta accuorto,

"buca resta" ce dice,

verimmo a chi attocca

'a caccia accummencia,

a tturno si joca,

ogniruno sta' attiento

a comme se move

amma sta' arreparàti

na preta, nu bbuco,

ce spustammo speranno

e nu furnì mmocco 'o lupo

"scaccia", na mana subbeto

sposta 'e vriccilli,

pulezza 'o tturreno

tra pallina e scignillo

s' appripara, po' tira,

'sta vota ha cugliuta,

se sente 'o rummore,

'a pallina è vinciuta

na mamma che cchiamma,

mo c'amma fermà,

po doppo mangiato

turnammo a pazzià.